Əli Kərimli saxlanıldıqdan sonra sərbəst buraxılıb (yenilənib)

AXCP sədri Əli Kərimli 1 saat saxlanıldıqdan sonra buraxılıb. O bildirib ki, hüquq-mühafizə orqanları xeyriyyə marafonu ilə yürüşü səhv başa düşüblər:

"Mənə Bakı şəhər prokurorunun müavini, Binəqədi prokuroru və polis rəisi öz aləmlərində xəbərdarlıq elan etdilər. Ki, guya biz hansısa yürüş keçirib idarə və müəssisələrin işini pozmaq istəmişik, ictimai qaydanı pozmağa çalışmışıq. İzah etdim ki, heç bir qanunsuz hərəkətimiz olmayıb, qanunsuz cərimələnən adamlara xeyriyyə marafonu keçirirdik, burda qanunsuz bir şey yoxdur və yürüş keçirdəndə əvvəlcədən bəyan edirik. Ona görə də xəbərdarlığı da qanunsuz sayıram. Baş verənlər hakimiyyətin sivil rəqabətə hazır olmadığını göstərir, əslində, hakimiyyətin polis mahiyyəti növbəti dəfə üzə çıxır".

Əli Kərimli ondan izahat alınmadığını deyib.

***

Müsavat Partiyasının qərargahında iyunun 28-də siyasi motivlərlə həbs olunan şəxslər üçün keçrilən dəstək marafonuna polis müdaxiləsi olub.

Polis AXCP sədri Əli Kərimlini saxlayıb.

Partiyanın Rəyasət Heyətinin üzvü İlham Hüseynin verdiyi məlumata görə, Əli Kərimli və mühafizəçi Ruslan Əmirov Binəqədi Rayon Polis İdarəsinə aparılıblar:

“Dəstək marafonu qapalı şəraitdə, qərargahda keçirilir. Polisin bura xəbərdarlıq etmədən müdaxiləsi qanunsuzluqdur. Hazırda polis qərargaha girib marafonu saxlamağı, hamını zalı tərk etməyi tələb edir”.